ავიაკომპნაია Wizz air-ის კორპორაციული კომუნიკაციების ხელმძღვანელი ჟაჟა ტრუბეკი ავიაბილეთების გაძვირების სხვადასხვა ფაქტორს ასახელებს, მათ შორისაა საავიაციო საწვავზე ფასის ზრდა და მოგზაურობაზე გაზრდილი მოთხოვნა, რაზეც მან BMG-სთან ინტერვიუში ისაუბრა.

ჟაჟა ტრუბეკის თქმით, ერთ-ერთი მიზეზი საავიაციო საწვავზე ფასის ზრდაა, მეორე ფაქტორი კი ინფლაციაა. ის ასევე აღნიშნავს, რომ Wizz Air-ის ბილეთის ფასი ყოველთვის დინამიკური იყო და დამოკიდებული მოთხოვნა/მიწოდებაზე. თუ ბევრი ადამიანი მოინდომებს მოგზაურობას, აშკარაა, რომ ბილეთები უფრო გაძვირდება.

“ივნისში მგზავრების რეკორდული რაოდენობა გვყავდა. მანამდე ამდენ მგზავრს Wizz air-ით არ უფრენია. ბევრ ადამიანს სურს ფრენა და მოთხოვნა მაღალია. შედეგად, ფასები გაიზარდა. თუ მოთხოვნა შემცირდება, შესაძლებელია, რომ ბილეთების ფასი შემცირდეს შემოდგომაზე ან ზამთარში. ბილეთის ფასებთან დაკავშირებით პროგნოზირება არ შემიძლია, თუმცა როგორც ყოველთვის შემოდგომასა და ზამთარში ადამიანები, როგორც წესი, ნაკლებს მოგზაურობენ და დაბალი მოთხოვნის პირობებში, ფასი მცირდება”,-აცხადებს ჟაჟა ტრუბეკი.

1-ლი აგვისტოდან Wizz Air-მა ქუთაისის საერთაშორისო აეროპორტში დააბრუნა მეორე ბაზირებულ საჰაერო ხომალდი და ესტონეთისა და საფრანგეთის მიმართულებით ფრენები განაახლა. ასევე ფრენის სიხშირეები გაიზრდება ათენის, სალონიკის, ბერლინის, ბარსელონას, მილანის, დორტმუნდის, მემინგენის, რიგის, პრაღისა და ვროცლავის მიმართულებით.

მიმდინარე წლის 6 თვის მონაცემებით, Wizz Air-ი ქუთაისის აეროპორტში ჯამურად მოემსახურა 255 310 მგზავრს და გადაყვანილი მგზავრების ოდენობის მიხედვით საქართველოს ავიაბაზრის ლიდერია.

ქუთაისის საერთაშორისო აეროპორტში, ამ ეტაპისთვის, 4 ავიაკომპანია 17 ქვეყნის 28 მიმართულებით ოპერირებს.

ერთი წლის განმავლობაში საავიაციო საწვავი 150%-ით გაძვირდა. ჩინური ავიაკომპანიები თებერვლიდან მოყოლებული საწვავის გადასახადს უკვე მეხუთედ ზრდიან.

მიუხედავად იმისა, რომ ევროპული ავიაკომპანიები კვლავ სთავაზობენ მგზავრებს ფასადაკლებას, ევროკავშირში ავიაბილეთების ფასი საკმაოდ იზრდება.

ამერიკის შეერთებულ შტატებშიც ანალოგიური მდგომარეობაა. 2020 წლიდან 2022 წლის დასაწყისამდე ტრანსკონტინენტური ფრენები ევროპაში 200 დოლარამდე ღირდა, ახლა კი სრულიად სხვა სურათის წინაშე ვდგავართ. ასევე, 2019 წლამდე ამერიკულ ავიაციაში ადგილების რაოდენობა, მოთხოვნის შესაბამისად, მზარდ მაჩვენებლს წარმოადგენდა. თუმცა დღეს ის 6%-ით ჩამორჩება პანდემიამდელ მაჩვენებელს.

გასათვალისწინებელია ის ფაქტორიც, რომ ავიაკომპანიები პილოტებისა და ბორტგამცილებლების მწვავე დეფიციტს განიცდიან.

ამ ყოველივეს ემატება ისიც, რომ მწვანე აქტივისტები ითხოვენ ნახშირბადის ემისიების შემცირებას ფრენების რაოდენობის შემცირებით.

ამ მიზეზების გათვალისწინებით, სავარაუდოდ, ავიაბილეთების ფასები აღარასდროს გაუტოლდება 2019 წლის მაჩვენებელს.

მგზავრი, რომელიც ქუთაისის აეროპორტიდან შეცდომით, ვარშავის ნაცვლად აბუ დაბიში მოხვდა უკვე დანიშნულების ადგილასაა.

როგორც ქუთაისის აეროპორტში აცხადებენ, მგზავრი აბუ დაბიში სასტუმროში გადაიყვანეს, შემდეგ კი პირველივე რეისით ვარშავაში გაფრინდა.

ცნობისთვის, სოციალურ ქსელში გავრცელდა პოსტი, რომელშიც გოგონა ყვებოდა რომ მისი და სხვა თვითმფრინავში აღმოჩნდა.

,,ქუთაისის აეროპორტიდან , ჩემს დას Wizz Air ფრენა ქონდა ვარშავის მიმართულებით, გაიარა რეგისტრაცია. შემდეგ საითააც უთხრეს იქეთ წავიდა . აღმოჩნდა აბუ დაბის თბითმფრინავში.

ბარგი კი გაგზავნეს გაურკვეველი მიმართულებით. აბუ დაბის აეროპორტში არავინ არ ეხმარება, ტელეფონზეც კი არ არეკინებენ , არც პოლიცია აქცევს ყურადღებას, ყველა ეუბნება საქართველოდან, რატო გამოგიშვეს ასეო.

ბარგს რაც შეეხება ჯერ ვიცოდით , რომ იყო ვარშავაში , შემდეგ გავიგეთ ქუთაისშიაო,

გთხოვთ თუ იცით ან მსგავსიი შემთხვევა თუოდესმე ყოფილა დაგვეხმარეთ რამენაირა

” – წერდა სოციალურ ქსელში მოქალაქე.