ზაფხულის დადგომასთან ერთად უფრო და უფრო გვიძნელდება მუშაობა, სამსახური,
ყოველდღიური რუტინა და დამღლელი გრაფიკი, ერთი სული გვაქვს, როდის ავიღებთ
ნანატრ შვებულებას, როდის მოვრჩებით გამოცდებს ან უბრალოდ, როდის გვექნება
თავისუფალი დრო, რათა ნანატრი დასვენების საათები მოვიწყოთ.
სამოგზაურო დღეების შერჩევის შემდეგ არანაკლებ მნიშვნელოვანია იმ ლოკაციების
გადახედვა და დათვალიერება, სადაც მოგზაურობას ვგეგმავთ. ინტერნეტი ამისთვის
ყველაზე ხელსაყრელი საშუალებაა, თუმცა ურიგო არ იქნება სხვების გამოცდილება და
რჩევებიც გაითვალისწინოთ.
Avia.ge ამჯერად იმ ევროპული ქვეყნების ჩამონათვალს გთავაზობთ, რომლებსაც ამ
ზაფხულს აუცილებლად უნდა ესტუმროთ.
ისლანდია – ეს ქვეყანა/კუნძული უიშვიათესი ადგილია დედამიწაზე. ისლანდია
ზაფხულშიც და ზამთარშიც ერთნაირად საინტერესო და ლამაზი ქვეყანაა, რომელსაც
ტურისტები აქტიურად სტუმრობენ. ზამთარში კუნძული თოვლითაა დაფარული,
ზაფხულში კი სიცხის მაგივრად ისე თბილა, რომ სტუმრობა განსაკუთრებით სასიამოვნოა.
რა უნდა ნახოთ ისლანდიაში? – პირველ რიგში, ვეშაპების სანახაობაზე წადით, შემდეგ
გეიზერების ველი, ეროვნული მუზეუმი და ვატნაიოკულის ნაციონალურ პარში მყინვარები
და ჩანჩქერები მოინახულეთ.
ალბანეთი – აღმოსავლეთ ევროპის ეს პატარა ქვეყანა მნახველს გასაოცარ სანაპიროებს,
თეთრ ქვიშებს, უძველეს ქალაქებსა და კიდევ უამრავ მრავალფეროვან სანახაობას
ჰპირდება. ალბანეთი „არსებობს“ თითქმის ყველა ტიპის მოგზაურისთვის – ლაშქრობისა და
მთების მოყვარულებს შეუძლიათ ალბანური ალპები დალაშქრონ, ზღვისა და მზის
მოყვარულთ კრისტალურად სუფთა სანაპიროები, ჩანჩქერები და „ლურჯი თვალი“ ელით,
სიძველისა და ისტორიის მოყვარულთ კი დედაქალაქი ტირანა ელით.
შოტლანდია – ვინმემ რომ გკითხოთ, ერთი სიტყვით შეაფასეთ ბრიტანეთის კუნძულებზე
განლაგებული შოტლანდიაო, აუცილებლად უნდა უპასუხოთ, რომ ის დრამატული
ქვეყანაა. დრამატული ტყეებით, მკაცრი სანაპიროებით, მწვანე ბორცვებით, მძაფრი
ისტორიით და პირქუში ციხე-კოშკებით, ის აუცილებლად უნდა შეიყვანოთ თქვენს
სამოგზაურო ქვეყნების სიაში. შოტლანდია მაღალმთიან რეგიონებს შორის ყველაზე
გამაჯანსაღებელი ჰაერით გამოირჩევა, ასევე, ეროვნული პარკებით, ლოხ ნესის ურჩხულით,
საოცარი ლადშაფტით, ედინბურგით, გლაზგოთი და ბენ ნევისით ხიბლავს მოგზაურებს.
ნორვეგია – თუ ზემოთ, ჩრდილოეთისკენ გადაწყვეტთ წასვლას, მაშინ არაფრით არ უნდა
გამოგრჩეთ ნორვეგია – სამოთხე დედამიწაზე. სკანდინავიის ნახევარკუნძულზე მსოფლიოში ყველაზე ბედნიერი ხალხით დასახლებულ მიწაზე სანახავი ძალიან ბევრია:
პრეიკესტოლენის კლდე ტურისტების ერთ-ერთი საყვარელი ადგილია, ალტას კლდის
ხელოვნება, რომელიც პირველი ადამიანების საქმიანობას ასახავს, უძველესი ხის სახლები
ქალაქ ბრიგენში, სკანდინავიური ხის არქიტექტურის თვალსაჩინო ნიმუში – ურნესის ხის
შავი ეკლესია და რა თქმა უნდა, თანამედროვე ოსლო, რომელიც ღირშესანიშაობების
სიმრავლით გამოირჩევა.
საბერძნეთი – რა იქნებოდა მსოფლიო, რომ არა სანტორინის ულამაზესი, ვულკანური
ლანდშაფტი, მეტეორას მონასტერი, სალონიკის „თეთრი კოშკები“, ათონის მთის
მონასტრები, იონიის, ეგეოსის ზღვები და რა თქმა უნდა, ათენი, უძველესი ცივილიზაციის
ცენტრი. მოგზაურებისთვის საბერძნეთი და მისი კუნძულები ერთ-ერთი ყველაზე
საყვარელი ადგილია, რადგან ის მრავალფეროვანი ბუნებით, არქეოლოგიური
საგანძურებით, უნიკალური კულტურით, კრეტით, ოლიმპოთი და ბერძნული ეპოსით
გამოირჩევა.
ხორვატია – ცენტრალური ევროპის პატარა ქვეყნის ეკონომიკაში ტურიზმი დომინანტია,
მისი უდიდესი ნაწილი კი ადრიატიკის სანაპიროზე მოდის, სადაც მნიშვნელოვანი
კურორტები მდებარეობს. გარდა ულამაზესი პლაჟებისა, ხორვატიაში ისტორიული
ღირშესანიშნაობების, ეროვნული პარკებისა და წარმოუდგენლად ლამაზი ტბების
მონახულებაც შეგიძლიათ, ასევე, სპლიტში შეგიძლიათ დიოკლეტიანეს სასახლე
დაათვალიეროთ, დუბროვნიკში კი – უძველესი ქალაქის კედლები.